النائب يوسف الجميل.. سأتقدم بكشف حساب يشمل كل القطاعات والملفات اللى تخص الدائرة

﴿وَقُلِ اعْمَلُوا فَسَيَرَى اللَّهُ عَمَلَكُمْ وَرَسُولُهُ وَالْمُؤْمِنُونَ﴾

صدق الله العظيم.

أهلى وناسى فى بندر ومركز بني سويف:

من يوم ما تشرفت بثقتكم، وحلفت اليمين كنائب عنكم في منتصف يناير 2026، وأنا شايل أمانة ومسؤولية كبيرة قدام ربنا وقدام كل واحد فيكم.

وعشان من حقكم تعرفوا إيه اللى اتعمل، وإيه اللي اتقدم، وإيه اللي اتتابع، وإيه اللي لسه شغالين عليه، هنبدأ خلال الفترة الجاية في نشر كشف حساب كامل عن الفترة اللى فاتت، من يوم حلف اليمين وحتى فض دور الانعقاد في نهاية يوليو 2026.

كشف الحساب هيشمل كل القطاعات والملفات اللى تخص أهلنا فى الدائرة:

“الصحة – الإسكان – البنية التحتية – الصرف الصحي – الأوقاف – التربية والتعليم – التعليم العالى – الاتصالات – الشباب والرياضة، وغيرها” من الملفات والخدمات والطلبات اللي اشتغلنا عليها وتابعناها.

وأحب أقولها لكم بكل وضوح:

أي نجاح اتحقق، من فضل ربنا، فهو بوجودكم وسندكم وثقتكم.

أنا لوحدي مقدرش أعمل حاجة، وقوتي الحقيقية فيكم، وفي وقوفكم معايا، وفي كل واحد فيكم بيبلغني بمشكلة أو طلب وبيساعدنا إننا نوصل لصوت الناس واحتياجاتهم.

وفى نفس الوقت، لو قصّرنا في حاجة، أو كان فى طلب ما قدرناش نحققه بالشكل اللي كنتم تتمنوه، فسامحونى.

إحنا بشر، وبنجتهد وبنحاول، وأي تقصير هنعتبره مسؤولية علينا، وهدفنا في الفترة الجاية إننا نتجاوزه ونشتغل بصورة أفضل، ونجتهد أكتر، ونبذل كل اللي نقدر عليه لخدمتكم.

والأهم إن كشف الحساب مش معناه إن الموضوع انتهى.

كل طلب اتقدم لنا هو أمانة، وكل مشكلة وصلتنا هنفضل نتابعها.

وفي الفترة الجاية، بإذن الله، هننزل كل القرى والنجوع تانى، وهنرجع نتابع الخدمات على الأرض، وهنراجع كل الطلبات والمشاكل اللي اتقدمت لنا، ونشوف إيه اللي تم وإيه اللي لسه محتاج متابعة.

ومكتبنا مفتوح لكم طول الوقت، وبابنا مفتوح لكل أهلنا، لأي حد عنده طلب أو مشكلة أو خدمة محتاجة متابعة.

أنا مؤمن إن النائب مش دوره كلام بس، النائب دوره يكون بين الناس، يسمعهم، ويتابع مشاكلهم، ويسعى في حلها بكل ما يملك من أدوات.

وفي النهاية، أحب أقول لكم:

إحنا بدأنا المشوار مع بعض، وهنكمله مع بعض.

نجاحنا الحقيقى مش في عدد الطلبات اللى قدمناها، لكن فى كل خدمة وصلت لمواطن، وكل مشكلة اتحلت، وكل خطوة حسّت الناس إنها مش لوحدها.

ربنا يقدرنا على خدمتكم، ويكون القادم أفضل بإذن الله.

أخوكم/ يوسف شعبان الجميل

عضو مجلس النواب

عن دائرة بندر ومركز بنى سويف